Dama i kabayeronan,

Ami ta Frank Rosina i mi ta presidente di Fundashon Kòrsou su Futuro. Un fundashon independiente ku ta bai hiba kampaña pa opshon SI na referèndem di 15 di mèi próksimo. Pasobra den nos opinion SI ta e mihó opshon pa futuro di Kòrsou, pa empleo, enseñansa, seguridat, salubridat públiko i kuido médiko, i pa nos grandinan, ku mester por gosa den tur trankilidat di un penshun bon meresí.
 
Dikon nos a skohe pa lanta un moveshon independiente? Pasobra nos mes ke karga  responsabilidat pa futuro di nos pais. Si nos polítikonan lo a hasi esei, nos moveshon lo no tabata nesesario. Nos a spera ku tantu koalishon komo oposishon lo a tuma nan responsabilidat dor di spika pueblo di Kòrsou na un manera honesto i kompleto kiko e referèndem aki ta enserá i dor di trese tur argumento pro i kontra pa dilanti bon kla.
 
Lastima ku esaki no a pasa. E koalishon aktual a warda muchu largu ku su informashon na pueblo. I ora ku nan a laga tende algu di nan, hopi biaha esaki tabata un warwarú inkomprendibel di echonan i historianan tékniko. Oposishon  na mes momentu ta mira e referǹdem aki komo un oportunidat perfekto pa brua tera i mustra dede den direkshon di koalishon, prinsipalmente pa nan por tuma asiento riba stul di mandatario atrobe. Oposishon ta hasi bochincha, sin duna niun alternativa real kon sí mester sigui.
 
Si esaki lo tabata un kampaña di elekshon, lo mi no tabata asina rabiá. Pasó asina ta, ora di elekshon. Elekshon ta e plataforma pa hiba polítika i promové bo partido. Pero esaki no ta un elekshon, esaki ta un referèndem. Un momentu pa para ketu i hasi un pregunta imparsial na pueblo pa e vosiferá su punto di bista pa ku futuro di su pais.

I pasó nos polítikonan no a tuma nan responsabilidat debidamente pa nos futuro, nos a disidí di lanta ariba. Fundashon Kòrsou su Futuro ta un grupo di yu di Kòrsou ku ta malkontentu ku e manera ku e kampañanan pa referèndem a ser hibá te ku awor. Nos no ta parti di gobièrnu, i nos no ta parti di oposishon. Nos ta un movementu independiente ku miembro for di tur gremio di komunidat ku a studia e pregunta di referèndem bon i a yega na e konklushon ku SI ta e úniko opshon responsabel pa futuro di Kòrsou.
 
Nos no por haña nos mes tampoko den e kampaña polítiko, partidista, i iresponsabel di e kampo di ‘NO’. Nos ta haña ku futuro di Kòrsou no tin mag di sufri bou di politikería i influenshanan partidista. Ta deber di kada un di nos pa tuma un desishon responsabel pa bienestar di nos yunan i di nos nietunan.
 
Pasó di kiko eksaktamente e referèndem aki ta trata? Riba 15 di mei nos tin ku disidí si nos ta bai di akuerdo ku e resultado di negoshashonnan ku Ulanda. Ulanda a ofresé pa kanselá gran parti dje debe ku nos polítikonan a krea den e dékadanan pasá. A kambio, nos mandatarionan tin ku primintí ku den futuro nan lo no gasta mas sèn ku nan ta gana di belasting. Un komishon di kuater representante Antiano i dos Ulandes ta enkargá pa kontrolá nos mandatarionan estriktamente riba esaki, algu ku segun nos ta di aploudí.
 
Esaki den breve ta e esensia di e referèndem aki. Nos di Fundashon Kòrsou su Futuro ta haña ku e úniko kontestá ta ‘SI’. E sanamentu di debe ta trese nos situashon finansiero den balanse bèk. SI ta nifiká ku nos por inbertí atrobe den enseñansa, salubridat, seguridat, empleo i infrastruktura. SI ta nifiká ku nos grandinan por sigui gosa di nan penshun meresí. SI ta nifiká ku nos ta tene tur opshon habrí, tambe nos soño di mas outonomía. I SI ta nifiká ku nos NO ta pará nos so den e mundu insigur aki.
 
E chèns aki nos ta haña un biaha so. Komprondé ku e chèns aki a wòrdu kreá promé ku Ulanda - i restu di mundu - a kai den krisis finansiero. Pues e chèns aki a wòrdu negoshá promé ku Ulanda - i resto di mundu - mester a kuminsá ekonomisá severamente. I e chèns aki a keda kreá promé ku e partido di Geert Wilders i Hero Brinkman a bira e partido polítiko mas grandi di Ulanda. Polítikonan ku ta pretendé ku nos por renegoshá ku Geert Wilders anto durante un krisis finansiero mundial, pa yega na mihó kondishon no ta nada otro ku bruadó di tera.
 
P’esei nos ta pará aki awe. P’esei di awe pa 15 di mèi nos ta bai hiba un kampaña honesto, i bon kla pa opshon SI, e úniko opshon pa nos futuro. Nos ta bai sòru pa tur argumento pa vota ‘SI’ wòrdu spliká na plaka chikí. SI pa empleo, SI pa enseñansa, SI pa salubridat, SI pa infrastruktura, SI pa penshun, SI pa stabilidat.

Nos lo hiba kampaña na televishon, na radio, den korant, riba internet, i den tur kaya i bario di Kòrsou. E lo bira un kampaña positivo, na kua tur hende ku stima Kòrsou i ku ke bai dilanti tin mag di partisipá. Ta ku hopi plaser nos ta anunsiá ku e koperashon i kontribushon di un i tur ku a partisipá den e proseso aki a redundá den un Plan Stategiko i un kampanja difersifika i ku hopi ideanan inovativo pa jega na pueblo ku nos informashon riba Referendem 2009.

Nos ta sinti nos orguyoso i honrá ku awe nos por lansa nos kampaña aki den Marchena. Un kampaña ku nos ta konvensi ku lo enkurashá un gran parti di pueblo pa a base di nan konvikshon sali kas dia 15 di mei proksimo i bai Vota SI den Referèndem.
Pasobra, mi ta ripití... esaki no ta un kampaña polítiko. Esaki ta pa nos futuro. I awor a yega ora pa splika logo i lema di nos kampaña.

Nos logo ta un balòn di teksto ku ta simbolisá bos di pueblo ku ta lanta ariba i bisa SI  den koló di nos flamante bandera, símbolo di nos orguyo i patriotismo. Nos kampaña su lema ta: DESIDIDO !!
DESIDIDO pasó nos ta konvensí ku na final di nos kampaña un gran parti di pueblo di Korsou lo ta determiná pa hasi uso di nan derecho pa bai vota SI pa Korsou su Futuro.
DESIDIDO paso nos ta konvensí ku SI ta e mihó i den nos opinion úniko opshon realístiko i responsabel ku ta duna pueblo di Kòrsou e siguransa ku tin un trayekto determiná pa yega na e Korsou Outonomo den Reino na bienestar di unitur. Si…ta pa Korsou su Futuro.
Un futuro ku nos kada un lo tin di traha na dje. E pakete pa Referèndem 2009 ta brinda den nos opinion sufisiente garantía pa por kuminsá konstruí riba un fundeshi solido nos Korsou su Futuro.

Pueblo di Korsou ta konsiente ku Referendem 2009 no ta un elekshon politiko pa ningun politiko ni partido. Referendem 2009 ta e fundeshi pa Korsou su Futuro.

Pueblo di Korsou ta konsiente ku lòs for di polítika nos tin ku bai skohe pa futuro di nos yunan, nietunan, bisa-nietunan i nos mes.
Korsou su SI mester ta DESIDIDO pa nos habri kaminda pa konstruí Korsou su Futuro.

Pueblo di Korsou, 15 di mei proksimo nos tur lo ta DESIDIDO…..SI !!