Ami ta Frank Rosina i mi ta presidente di Fundashon Kòrsou su Futuro. Un fundashon independiente ku ta hiba kampaña pa opshon SI na referèndem di 15 di mèi próksimo.

Den nos opinion SI ta e mihó opshon pa futuro di Kòrsou, pa empleo, enseñansa, seguridat, salubridat públiko i kuido médiko, i pa nos grandinan, ku mester por gosa den tur trankilidat di un penshun bon meresí.

Fundashon Kòrsou su Futuro no ta parti di gobièrnu, ni oposishon. Nos ta un movementu independiente ku miembro for di tur gremio di komunidat ku a studia e pregunta di referèndem bon i a yega na e konklushon ku SI ta e úniko opshon responsabel pa futuro di Kòrsou. Tur hende ku ke partisipá na e movementu aki ta bon biní.

Fundashon Kòrsou su Futuro ta yega na su fondonan pa medio di un proseso transparente di kontribushon di individuonan i empresanan ku ta kere den nos movementu. Un komishon finansiero ta supervisá atministrashon responsabel di kontribushonnan i gastunan. E sifranan aki lo ser kontrolá pa un ofisina di accountant respetá. Tur kontribushon ta bon biní. Laga nos uni pa huntu sigurá nos futuro.

Dikon nos a skohe pa lanta un moveshon independiente?

Pasobra nos mes ke karga responsabilidat pa futuro di nos pais dor di spika pueblo di Kòrsou na un manera positivo, honesto i kompleto kiko e referèndem aki ta enserá.

Elekshon ta e plataforma pa hiba polítika i promové partido. Esaki no ta un elekshon, esaki ta un referèndem. Un momentu pa para ketu i hasi un pregunta imparsial na pueblo pa e vosiferá su punto di bista pa ku futuro di su pais. Esaki ta un derecho fundamental di un pueblo den un pais demokrátiko.

Nos ta haña ku futuro di Kòrsou no tin mag di sufri bou di politikería i influenshanan partidista. Ta deber di kada un di nos pa tuma un desishon responsabel pa bienestar di nos yunan i di nos nietunan.


Desidido,

Frank Rosina
Presidente