Grupo-Nò ta bisa ku pueblo no ta gana nada ku e debe ku Hulanda ta paga, pasobra ta bankonan so ta haña tur sèn. Esei ta bèrdat?

Pueblo TA benefisiá di solushon di debe.

Ban kompará. Abo ta tata di famia. Bo debe un banko asina tantu sèn, ku no ta sobra nada fin di luna pa bo yunan kome, bisti i biba. Bo ta pidi un ruman pa paga gran parti di debe pa bo. Kon bo ruman mester hasi esei? E mester parti un saku di sèn entre bo yunan? Natural ku nò. Esei no ta yuda ku nada, pasobra e debe ta keda eksistí. Bo ke pa bo ruman paga e debe na e banko. Asina bo mes ta sobra sèn tur luna pa sòru pa bo yunan kome, bisti i biba.

Ku e debe di Kòrsou ta meskos. Kòrsou debe institutonan manera nos fondo di penshun, nos banko di seguro sosial, bankonan komersial i otronan. Hulanda ta kubri gran parti di e debe. Si Hulanda kana parti un saku di plaka entre pueblo di Kòrsou, e problema ta keda eksistí. P’esei Hulanda ta pone e plaka disponibel pa gobièrnu paga tur esnan ku gobièrnu debe. E ora ei gobièrnu no mester usa plaka di pueblo mas pa paga debe. Plaka di pueblo ta keda e ora ei pa benefisionan di pueblo mes, manera skol, kas, kaminda, salú públiko, kuido sosial, etc. Meskos ku den e ehèmpel akiriba, kaminda bo ta sobra sèn pa sòru pa bo yunan biba.